ಭಾರತೀಯ ಅಂಚೆ ಇಲಾಖೆಯು ತ್ವರಿತ ಪತ್ರ ಬಟವಾಡೆಗೆ ಅನುಕೂಲವಾಗುವ ನಿಟ್ಟಿನಲ್ಲಿ ಪ್ರತಿ ಬಟವಾಡೆ ಮಾಡುವ ಅಂಚೆ ಕಛೇರಿಗೆ ಅದರದ್ದೇ ಆದ ಗುರುತಿನ ಸಂಖ್ಯೆಯನ್ನು ನೀಡುವುದರ ಮೂಲಕ ಪತ್ರ ಬಟವಾಡೆ ಸೇವೆಯನ್ನು ಸುಲಭಗೊಳಿಸಿದೆ. ಆ ಮೂಲಕ ಇಂತಹ ಗುರುತಿನ ಸಂಖ್ಯೆಯನ್ನು “ಪಿನ್ ಕೋಡ್” ಎಂದು ಹೆಸರಿಸಲಾಯಿತು.
ಕೇಂದ್ರ ಸಂಪರ್ಕ ಇಲಾಖೆಯ ಅಪರ ಕಾರ್ಯದರ್ಶಿಯಾಗಿದ್ದ ಶ್ರೀ. ಶ್ರೀರಾಮ್ ಬಿಕಾಜಿ ವೇಲಂಕರ್ ಇವರು ಆಗಸ್ಟ್ 15, 1972 ರಂದು ಪಿನ್ ಕೋಡ್ ಸೇವೆಯನ್ನು ಆರಂಭಿಸಿದರು. ಪಿನ್ ಕೋಡ್ ನ ವಿಸ್ತೃತ ರೂಪ – “ಪೋಸ್ಟಲ್ ಇಂಡೆಕ್ಸ್ ನಂಬರ್”. ಪಿನ್ ಕೋಡ್ ಆರು ಅಂಕೆಗಳಿಂದ ಕೂಡಿದ್ದು, ಇವುಗಳಲ್ಲಿ ಮೊದಲಿನ ಅಂಕೆಯು ಪೋಸ್ಟಲ್ ಝೋನ್ , ಎರಡನೆ ಅಂಕೆಯು ಪೋಸ್ಟಲ್ ಸಬ್ ಝೋನ್ , ಮೂರನೇ ಅಂಕೆಯು ಸಾರ್ಟಿಂಗ್ ಡಿಸ್ಟ್ರಿಕ್ಟ್, ಕೊನೆಯ ಮೂರು ಅಂಕೆಗಳು ಸಾರ್ಟಿಂಗ್ ಡಿಸ್ಟ್ರಿಕ್ಟ್ ನ ಅಡಿಯಲ್ಲಿ ಬರುವ ಬಟವಾಡೆ ಅಂಚೆ ಕಚೇರಿಯನ್ನು ಸೂಚಿಸುತ್ತದೆ.
ಈ ಪಿನ್ ಕೋಡ್ ನ ಆಧಾರದಲ್ಲಿ ರವಾನಿಸಲ್ಪಡುವ ಪತ್ರಗಳು ವಿಂಗಡನೆಯಾಗಿ ಗಮ್ಯ ಅಂಚೆ ಕಛೇರಿಗಳನ್ನು ತ್ವರಿತವಾಗಿ ತಲುಪುವುದು. ಪ್ರಸ್ತುತ ಈ ಪಿನ್ ಕೋಡ್ ಅನ್ನು ಎಲ್ಲಾ ರೀತಿಯ ಅಂಚೆ ಸೇವಯಲ್ಲೂ ಅಗತ್ಯವಾಗಿ ಬಳಸಲಾಗುತ್ತಿದೆ. ಇಂದಿಗೆ ಪಿನ್ ಕೋಡ್ ಸೇವೆಯನ್ನು ಅಂಚೆ ಇಲಾಖೆಯಲ್ಲಿ ಆರಂಭಿಸಿ 50 ವರ್ಷಗಳು ಸಂದವು.
ಪ್ರತಿ ಅಂಚೆ ಕಛೇರಿಯ ಪಿನ್ ಕೋಡ್ ನ ಮಾಹಿತಿಯು ಇಂಡಿಯಾ ಪೋಸ್ಟ್ ವೆಬ್ ಸೈಟ್ (www.indiapost.gov.in) ನಲ್ಲಿ ಲಭ್ಯವಿದ್ದು, ಸಾರ್ವಜನಿಕರು ಉಪಯೋಗಿಸುವಂತೆ ಕೋರಲಾಗಿದೆ.
